عالم الأرواح

[أحمد عيسى]

عالم الأرواح


يـا رَيـتْ إنْــتِ وْ أنــا مِـن عــالــم الأرواح ...............
روحَـيـن عَــنّــا عُـيـون الـنـاس مـكـفـوفِــه

وْ نعمل بْسـاط الـهـوى وِ الرِّيـح إلنا جْـنـاح ...............
وْ نرحل عَ تاني دِنـي وْ ماْ تْـكون معروفِـه

وْ ماْ يْكونْ معنا حَـدا وْ نسكن قصر سَـيّـاح ...............
مـسـحـور فيه الـغُـرف بالـنّـور مــســقـوفِـه

وْ حيطان زهر وْ نِـدي مـنهـا العطر فَـوّاح ...............
و الأرض مسـحةْ حـلا بالـورد مـرصوفِـه

وْ شـباك مِـنّـو الهوى سَـلَّـم عَـلَـيـنـا وْ راح ...............
وِ طْـيـور جَـوقـةْ نـغـم عالـرّف مـصـفـوفِـه

و الباب قَـفْـلـو الحـيـا وْ طَـيَّرْ مَعو المفتاح ...............
وْ مـفـتـوح قـلـبـي أنـا يسـتـقـبـل ضْـيـوفـي

وْ بالـلَّـيـلْ ضَوّي لِـكِي بدر السّـمـا مصباح ...............
وْ إلا أنـا و العشــق و الشَّـوق ما تْـشـوفـي

وْ لَولا بِـلحظه انكسف نور البدر و انْـزاح ...............
ماْ بْريد عَينِـكْ يا عَـيـنـي تْـكـون مـكسـوفِـه

وْ أغـزل قصيدِه لْعَين فيهـا الرّمـش لَـمّـاح ...............
وْ إلا بِ درّ وْ دَهـبْ ماْ بْـرصِّـع حْـروفــي

وْ حاجب عَـلـَيها حرس متل السَّـيف دبّـاح ...............
وْ قِـدّام سَـيـفِـك أنـا شـو بْـتعـمـل سْــيـوفـي

و الشَّعرْ لَيل انْـسـدل , معْ كـل نَسـمِه لاح ...............
هُوّي قصيدةْ شِــعــر و الـرِّيـح مـعـزوفِــه

و الـخَــد قَـطْـفـو حِـلـي بِـمْـواســم الـتـفـاح ...............
حَـبّـات حمْـر وْ مِنِ الـفـردَوس مـقـطـوفِـه

وِ شْـفاف شَـفّـةْ خمر و الخمـر بدهـا قْـداح ...............
كاسـات شــهــد وْ مِن التسـنـيـم مـغـروفِـه

و الجِيد تلْج وْ جمر , مِن حَولْ مِنّو وْشاح ...............
وْ ما عْـرفتْ تلْج الجمر رح يحرق كْفوفي

وْ لَو جَنْ فينا الهوى وِ الشَّوق قلبي اجتـاح ...............
وْ لَـو صار لََـيـل الغِوى أسـرار مكشـوفِـه

خَـلّـي القميص الزّهر بعد الـتَّـعـب يرتـاح ...............
وْ ملهوف يشحد حـلا مْنِ عْـيـون ملهوفِـه



أحمد عيسى

[سامي مقسم]

رائع عم تخلينا نتحسر الله يزيدك ويعطيك العافية المشكلة ما بيطلع بايدي شعر مشان هنيك بالكلام الحلو الله يزيدك

[اسماعيل]

السلام عليكم ورحمة الله كيفك أخي أحمد الله يعطيك العافية على ها القصيدة الحلوة و بتمنى كون بعالم الأرواح

[طالب حسون]

حلووووووووووو ياأستاذ أحمد
كتر منهن هدول

[أحمد عيسى]

سامي , اسماعيل و طالـب .......... وجودن كل فرحة جالب

حْملت الحب و شو ما صار .......... رح يبقى بقلبي غـالـب

[®©ديـــوllن iiiJlـــعـر©®]

حلووووو يا ابو علي ونورتنا من جديد ياغالي

[أحمد عيسى]

شكرا يا ديوان نورت أهلا و سهلا فيك شرفتني