عركة قرادة (2)

[أحمد عيسى]

هذه دعوة مفتوحة مني لعركة زجلية لمن يود من الأعضاء ( و خاصة إلّي إلهن مراق بالزجل )

فأرجو ممن يريد خوض غمار المعركة يفتح الردة منشان نبلش

سأنتظر يومين و بعهدها رح بطلع أنا بردة

و أرجو ممن يود المشاركة مراعاة الوزن و عدم تكرار القوافي

[أبو عبد الرحمن]

الله حيو والله

وهي صفحة تحدي على بياض ....ويلي بدو يعبي اسمه

ويفرجينا حاله

وأنا بالنسبة إلي والله بتمنى يفوت نبيل فيصل ويتحدى ...لأنو والله اشتقت لزجله ....مع إنو ما بيستاهل .

[أحمد عيسى]

هـلأ كـــل شـــاعــر بــدّو .......... يْسنّ عْلى العركِه حدّو

وأحمد جايي وْ حامل سَيف .......... وْ وَيل لْ بيوقِّـف حـدّو

[أحمد عيسى]

أحـمـد جايي حتّى يْـسـلّ .......... عْلى الإعدا السَّيف المسنون

لا بْـيـنـهـان و لا بْـيـنـذلّ .......... وْ لا بْـيـنـضام وْ لا بِـيـهـون

و كل شاعرعَالعركِه طلّ .......... لَـو صاروا طْنعـشـر مليون

بـِفـطـر فيهن قـبـل الـكـلّ .......... وْ مـا بْـخـلّـيـهـن يــتــغـــدّو

[أبو عبد الرحمن]

طول بالك عليي يا أحمد عيسى

بلكي بتزبط معي وبجبلك نبيل فيصل ...حتى شوف عضلاتكـ معو ....وشوف عضلاتو معكــ

شغلة يومين بالكتير وبردلك خبر ....إنت خليكـ عم تسن سيفكـ

[أحمد عيسى]

يا أبو ياسر مازالت الدعوة مفتوحة و عامة للجميع و أنا ما قصدت أي عضو معين , إلّي بحب يشارك أهلا و سهلا فيه, أما بالنسبة للأخ نبيل فنحنا كلياتنا مشتاقين للزجل تبعو , و هو لو كانت ظروفو بتسمحلو ما بقصّر , و إذا كانت عركات الزجل سبب لرجوعو فأنا مستعد كل يوم أعمل عركة, أعيد إنو الدعوة عامة للجميع , و إلي مو عاجبتو الردّة وْ بدو يغيرها ما عندي مانع.

[فوزي سيلان]

شايف سل وسـن سـيـوف ــــــ معقول الداعي المقصـود؟؟ (يعني أنا )
قاعد عـم راقـب وبشــوف ــــــ ومخلّي الشـــعار تـجـود
لكـن مـا بـبـقـى مـكـتـوف ــــــ الأيدي وأحمد عم يســود
رح سل السـيف المعقوف ــــــ وشعّل هالساحة بــــارود
وسـيفك ياشــاعر مقروف ــــــ واحسن منو تحمل عــود
متلّم ما بـيـدبـح خــاروف ـــــــ ويا حسرة عاهالماخــود
الأحسن فيه تنفش صوف ــــــــ يــا أمـا تـحرّك مـعـقود
يا أحمد أصبـــح معـروف ــــــــ بأنك شــــــاعر موعود
وعنا بـتبـقـى عـالـرفوف ــــــــ بــس الـكبـار بـيـنـعـدو

مربى

[أحمد عيسى]

أهلا بالأخ فوزي شرفتنا بوجودك, بداية قوية منك ما شاء الله , بس شو رأيك منشان ما يملّوا منّا ما نطوّل الموضوع كتير , يعني كل واحد شي عشر ردّات


من راسك شيل الوسواس .......... و لا تْـجـرّب تلعـب بالنـار

عندي شعر مْن الإحساس .......... وْ عندي سَيف مْن الأفكار

لـمّـا جـيـت تْـكـبِّــر راس .......... و بْـإيــدَك حــامــل بــتّــار

عـنَّـك صارو يْقولو الناس .......... خــرجـــو ألــلــه لا يْــردّو

[opposition]

يا فوزي اوعا تحكي --------- مع الكبير بتتبهدل
احســلك هدّي بلكي --------- بتتحوّل طفل مدلّـل
الصياد الْ بدو سمْكة -------- بيسكت فترة وما بيسأل
وان فوّت حالو بعركة ------- مو قدها ، بيكسر زندو

[أحمد عيسى]

عْليّي يا مْعارض بتمون .......... و حبَّك عا قلبي فارض
بْتسمحلي هالـمـرة كـون .......... يا قلبي عْلَيك مْعـارض

و هي اكتشفنا زجّال جديد بالمنتدى الأخ opposition العزيز حبيب القلب , ردة قوية منك.

لكن من بعد إذنك بما إنو أنا بْمون عليك و إنت بتمون عليي يا ريت توقّف عالحياد بهالعركة و خليها بيني و بين الأستاذ فوزي

لأنو إذا صارت أكتر من تنين بتضيع الطاسة , يعني هلأ الأخ فوزي المسكين بدو يلاقيها منّك ولا مني, منشان يكون في
عدل بالموضوع , بتمنى منّك تسحب تهديدك للأخ فوزي حتي يضل معي

و إذا بتحب حضّر حالك بعد هالعركة بدنا نعمل أنا و يّاك عركة تانية

مع حبي

[opposition]

تكرم يا أستاذ أحمد
رح صف على جنب
ولو اني بشوف انو لو صارت العركة بين جوقتين بتكون احلى

اذا كانت فكرة الجوقتين مقبولة انا بقترح كون انا شريكك وينزل ابو منير عالملعب كشريك للأخ فوزي

[فوزي سيلان]

كل المحبة لك أستاذ أحمد وشاعرنا المعارض وبتمنى إنو نقضي مع بعض وقت ممتع ومفيد وأنا ما عندي مانع تكونو مع بعض بالعكس يمكن تحسنو تصمدو أكتر مع تحياتي وتقديري

هالعركة ماني قدا ــــــــــــــ لأنها بعمر ولادي
وفوزي لما بيتحدى ــــــــــــــ إنــتـو بصــف الردادي
عم إتأنى وإتـهــدّى ــــــــــــــ حتى ما تروحوا برادة
وجّبتوا بعض وعدّا ـــــــــــــ العيب عليــكم بزيـــادة
أحـمـدكلمــاتـك ردا ـــــــــــــــ ويامعارض فوق العادة
لما العزمات بشــدّا ـــــــــــــــ عا شي عـركــة قـرادة
إلكــن إيديني بمداــــــــــــــــ تا حطـكن خلفي تردوا

[أحمد عيسى]

شكراً يا opposition للإستجابة كلّك زوق , أما بالنسبة لإقتراحك أنا ما عندي مانع لكن الكرة بملعب أبو منير




عم تـغـلـط ألله يهـديـك .............. حاجتنا بشعرك تدفيش

هجماتي تْـردّا ما فـيـك .............. كافينـا تنفـش بالريـش

إيدَك مدهـا تا أعـطـيـك .............. كم ليرة عْلَيهـا بتعيش

عليّي لِّ تْعدّا يا شـريـك .............. بْسيفي بقـطـعـلـو يَـدّو

[أبو منير]

شاعــرنا فــــــوزي بـــدو.........عشرة ضرباتو يصدو

يـا معارض خـليــك بعـيد .........أحسنــلك ما لك قــــدو
........................................ .......................

أحــمد جـــايي بعز الصيف ............يتحـــــدى كل الشعار

والمعارض بنشوفوطيـــف ...........ما بيرعبنا مهما صار

كــل ما بإ يدو سـل السيف ............ومفكــــر حالو مغوار

من العركة بيرجع يا حيف .............مدبـوح بنصــلة حــدو

[أحمد عيسى]

يا هلا و غلا بمديرنا أبو منير , شرفت الميدان


خلوني بس أعمل شوية تنظيم للعركة:

opposition - أحمدعيسى (جوقة)

أبو منير - فوزي سيلان ( جوقة )

و بتكون المحاورة بالشكل التالي:

أبو منير × opposition

فوزي سيلان × أحمد عيسى

و بكون الدور من الآن فصاعداً على الشكل التالي:

1- فوزي سيلان
2- opposition
3- أحمد عيسى
4- أبو منير

كما أرجو أن يختار كل عضو لون مختلف عن الألوان الأخرى في الكتابة و يلتزم به طيلة المحاورة

إذاً المكرفون الآن مع الأستاذ فوزي.

شكراً

[فوزي سيلان]

أهلا ومرحبا بشاعرنا أبو منير كيفك؟ وين ما رجعت على أساس تكون رجعتك قريبة بس يلا بنشوفك بالضيعة
تكرم أستاذ أحمد رح نلتزم بلي اقترحتوا

ياصـغار اليــلة اتهدوا ــــــــــــــــــ لاتـتمــادوا وتـتــعـدوا
بعدوا عن أبـو منيــر ــــــــــــــــــ البـيـت علـيكن بيهدوا
ــــــــــــــــــــــــــــــــــــــــ ــــــــــــــــــــــــــــــــــــــــ ـ
يا أهـلا بشيخ الشـــعار ـــــــــــــــــ بمدحك بيجود لسـاني
لا تتعب يا شيخ الكــار ـــــــــــــــــ هالعلقـة مو حرزانــة
تنيناتن أطــفال صغــار ــــــــــــــــ تروى عليهن أمـانــة
مو خرجن نظم الأشعار ــــــــــــــــ ولا رداتن عـمـرانـــة
شغّلهن عندك بــالــدار ـــــــــــــــــ يحصوا شعرك ويعدّوا

[أحمد عيسى]

اسمحولي عدّل بالدور أخي فوزي منشان يصير واحد منكن و واحد منا هيك أزبط أنا ما نتبهت لهالنقطة يعني الدور بصير هيك

1- فوزي سيلان
2- أحمد عيسى
3- أبو منير
4- opposition


شو رأيك

[أحمد عيسى]

مش جايي عدّ الأشعار .......... وْ لا فيك البَيت تْهدو
أحمد جايي بهالمشوار .......... عضمَك هاللَّيلِه يْعدّو


-------------------------

سيلاني بالشـعـر زْغـيـر .......... عامل شـاعـر بالـفـطـرة
نْطرتـو حتّى يصير كْبير .......... وْ مش حرزانِه هالنّطرة
وْ لولا حْسبـنا بالـتقـديـر .......... بْشعرو ما بْيطلع قـطـرة
وْ شعري بحر كبير كتير .......... لْ هلأ ما بنـعـرف حـدّو

[admin]

موضوع رائع
اتمنى للمشاركين فيه كل التوفيق
وأرجو أن يقوم كل من يرد (من الزجالين) باقتباس الرد السابق والذي يرد عليه ثم يسجل رده
فتصبح القراءة أكثر متعة

[أبو منير]

يا فوزي شعرك بستان .........منـــو قطفنا أحلى زهور
وللـمنبر رافـــع بنيـــان .........بيوت الشعر بنيتا قصور
جـوقـة أحمــد با لميـدان .........ناقصهون طبــل وزمور
واحــــد ليغنــي آ آمـــان .........وشريـكو يصــفق حــدو


........................................ .............................

[فوزي سيلان]

حلوة كتير كتير يا معلم

[opposition]

يا فوزي شعرك بستان .........منـــو قطفنا أحلى زهور
وللـمنبر رافـــع بنيـــان .........بيوت الشعر بنيتا قصور
جـوقـة أحمــد با لميـدان .........ناقصهون طبــل وزمور
واحــــد ليغنــي آ آمـــان .........وشريـكو يصــفق حــدو


........................................ .............................





موجود الطبل، ومعروف &&&&&&&&&&& بصوت الجاج البيّاضي

وزمّور الجرصة مزفوف &&&&&&&&&& ويا ريت القاضي راضي!!

زمْرك يا فوزي مكشوف &&&&&&&&&&& وطبلك يا محمد فاضي

والعالم يا ما حَ تشوف &&&&&&&&&&&& ساحر بيلاعب قِردو



محمد= ابو منير

[opposition]

حلوة كتير كتير يا معلم

شايفلك يا استاذ احمد
فوزي ومحمد عم يشجعو بعضون البعض
يرجى اعراب ما تحته خط اعراب مفردات وما بين قوسين اعراب جمل:

;)
(حلوة كتير كتير يا معلم)

:p

[فوزي سيلان]

موجود الطبل، ومعروف &&&&&&&&&&& بصوت الجاج البيّاضي

وزمّور الجرصة مزفوف &&&&&&&&&& ويا ريت القاضي راضي!!

زمْرك يا فوزي مكشوف &&&&&&&&&&& وطبلك يا محمد فاضي

والعالم يا ما حَ تشوف &&&&&&&&&&&& ساحر بيلاعب قِردو



محمد= ابو منير

.....................
منشان مدح وتوجيب أبو منير فهوي أولا معلمنا وثانيا مديرنا وثالثا شريكي بالجوقة وطبيعي نمدح بعض ورابعا وأهم من هاد كلو إنو حبيبنا ( هي إعراب ما تحته خط )

رح نرجـعلــك يابو طبـل ــــــــــــــ إل عم تقرع طبلك عنا
عالـغـارب رخّينـا الحـبـل ـــــــــــــ تفرعـن أحـمـد وتـغـنـّا
ولمعارض عم يشبل شبل ـــــــــــــ بضعف الشـعر بيتكنّى
صـار لازم جـهّزلن كــبـل ــــــــــــ وعرِّف كل واحـد حدّو

[أحمد عيسى]

أحــمــد رح يــبــقـى لـلعـصـر ......... يْـغـنّـي وْ يـرقــص مين قـدّو
لـمّـا الـنـاس بْـعـرس النـصـر ..........تْــقــوم و تــرفــعــلـــو يَــدّو



يـا مْـعـارض لـمّــا بــتــعــود .......... بْـعَـيـنـي الــكَـون بْـيِـتْـجَـمّـل
نـحــنــا بالــمــيــدان أْســـود .......... وْ وَيـلـو لِّ عْـلَـيــنــا أقــبــل
وْ بو مــنــيــر لْ عـم بـجـود .......... تــا يــربـــح لا يــتـــأمّــــــل
بْرقص و طبل وْ زمر وْ عود ......... الشّــعــر بْأشــعــارو تْــرمّــل
وْ يَـلّــي بــدّو بْكـبـل يْـســود .......... لَــو يـضـربـنـي مــا بـزعــل
المجنون لْ مـا عـنـدو قْـيــود .......... مــهــمــا عــمْــل بْـنـتـحـمَّـل
بْـيـأمـرنــا الـرّبّ الـمـعــبـود .......... نْـداري وْ نـعـطـف عـالأهـبـل
بْـفـنّـي جـايـي وَفّـي وْعــود .......... بـإبـــداع الـكـلـمِــه الأجــمــل
وِ لْـفَــوزي عـنـا مـشــهــود .......... جــايــي مـن بَــيــت مــأصّــل
بَـيّـو جـاد مْـن الــمــوجـــود .......... وْ جـــدّو رجّــــال مْــــعــــدّل
وْ هوّي من بعــد الـمـجـهـود .......... طِــلْــع مْــدلّــل و مْــبــهـــدل
لا مِــن بَـــيّـــو آخـــد جـــود .......... وْ لا رْجــولــيِّـــه مـن جـــدّو[/]

[أبو عبد الرحمن]

لا هيك تقلت العيار كتير يا أبو علي ( أحمد عيسى )

قوية جداً هي ...........يعني ( بتكسح )

[أحمد عيسى]

يا أبو ياسر بالحرب ما في يا إمي ارحميني, يا ويلو إلي بيلعب بذيل الأسد

بس دخلك شفلي أبو حسام شو هالملف الصوتي إلي أرفقو بالمشاركة, مين هاد إلى عم يحكي

يا جماعة المدير هو إلّي أرفق الملف و ما بعرف صوت مين هاد بس كتير بضحك

[admin]

الأستاذ أحمد

أقوم حالياً بتسجيل صوتي للمقاطع الزجلية
وإرفاقها بكل رد لمختلف المشاركين
وهذا مفيد لمن لا يعرف كيف يقرأ الزجل دون إخلال بالوزن
ويمكن للأعضاء قراءة النص خلال السماع للملف الصوتي فيتعودون على قراءة الزجل بالشكل الصحيح..


متنياً لكم المزيد من التألق

[أحمد عيسى]

جهودك مشكورة يا أبو حسام , الله يعطيك العافية , بس ليش ما خلّيت الصوت على طبيعتو

[admin]

الأستاذ احمد
هذه التجربة لأول مرة
وهي مهمة ليس للزجل فقط
بل للمواضيع المتعلقة بتعليم السريانية

ما فهمت شو بتقصد بسؤالك (ليش ما خلّيت الصوت على طبيعتو)
انا سجلت الصوت وسمعتو عادي
وحملتو على الموقع ورجعت نزلتو عالكمبيوتر وسمعتو كمان عادي

يعني ممكن تكون بتقصد اني كان لازم اقرأ الزجل مثل قراءة الشعر الفصيح
يعني بدون تنغيم
اذا كان قصدك مو مشكلة

[opposition]

انطلق ابو منير
عْطيها الله يعطيك
قبل ما نعتبر كلام ابو ياسر مزبوط

وتكون ردة الأستاذ أحمد كاسحة ماسحة
انا بعرفك أقوى من هيك وبتتحمل
هات سمعنا

[فوزي سيلان]

خليها تنغيم يا مديرنا أحلى
مشكورة جهودك والله يعطيك العافية

[أبو منير]

ياأحمـــــد لو كنتوا ألوف ..........ما فيكون واحـد عل قد

ولو كانوا الشعارصفوف............من ضرباتي رح ترتد

فــوزي بالــقدرة معروف ...........شـاعر ند بوقت الـجـد

بعركاتو ما بيعرف خوف...........مأصل من أب ومن جد

والمعارض وشومخطوف............ما عم نعرف لون الخد

من إيدواضاعت الحروف ...........وقت إلجرب يكتب رد

رح خـليه يشــيل دفــــوف ...........كل ما العركات إشتدو

........................................ .............................

[فوزي سيلان]

لاتقلي يا معارضنا هي مو حلوة من أبو منير(خارقة)

[opposition]

ياأحمـــــد لو كنتوا ألوف ..........ما فيكون واحـد عل قد

ولو كانوا الشعارصفوف............من ضرباتي رح ترتد

فــوزي بالــقدرة معروف ...........شـاعر ند بوقت الـجـد

بعركاتو ما بيعرف خوف...........مأصل من أب ومن جد

والمعارض وشومخطوف............ما عم نعرف لون الخد

من إيدواضاعت الحروف ...........وقت إلجرب يكتب رد

رح خـليه يشــيل دفــــوف ...........كل ما العركات إشتدو

........................................ .............................










بحملْ دَفْ وخلفي صفْ &&&&&&& مثلك هزّوا وما هدّو


وانْ نشّزْتْ بْلُوحكْ كف &&&&&&& والحبل بإيدي بشدّو
&&&&&&& &&&&&&& &&&&&&&

احمد عم يرسم صورة &&&&&&& للعركة بلون الإتقان

محمد بدو سبّورة &&&&&&& بْروضة، مع فوزي سيلان

(يشخبَط لخبَط طبشورة) &&&&&&& مثل الأهبل عَ الحيطان

(مْعجْرَمْ) من غير تنورة &&&&&&& جاجة بترقص للصيصان

ولو لفينا المعمورة &&&&&&& من أمريكا لليابان

بكل بحورا ونهورا &&&&&&& بكل جْبالا والوديان

نحنا الراية المنصورة &&&&&&& وانتو المهزوم المنهان

محمد ايدو مكسورة &&&&&&& وفوزي بيحكّو جلدو

[فوزي سيلان]

أحــمــد رح يــبــقـى لـلعـصـر ......... يْـغـنّـي وْ يـرقــص مين قـدّو
لـمّـا الـنـاس بْـعـرس النـصـر ..........تْــقــوم و تــرفــعــلـــو يَــدّو



يـا مْـعـارض لـمّــا بــتــعــود .......... بْـعَـيـنـي الــكَـون بْـيِـتْـجَـمّـل
نـحــنــا بالــمــيــدان أْســـود .......... وْ وَيـلـو لِّ عْـلَـيــنــا أقــبــل
وْ بو مــنــيــر لْ عـم بـجـود .......... تــا يــربـــح لا يــتـــأمّــــــل
بْرقص و طبل وْ زمر وْ عود ......... الشّــعــر بْأشــعــارو تْــرمّــل
وْ يَـلّــي بــدّو بْكـبـل يْـســود .......... لَــو يـضـربـنـي مــا بـزعــل
المجنون لْ مـا عـنـدو قْـيــود .......... مــهــمــا عــمْــل بْـنـتـحـمَّـل
بْـيـأمـرنــا الـرّبّ الـمـعــبـود .......... نْـداري وْ نـعـطـف عـالأهـبـل
بْـفـنّـي جـايـي وَفّـي وْعــود .......... بـإبـــداع الـكـلـمِــه الأجــمــل
وِ لْـفَــوزي عـنـا مـشــهــود .......... جــايــي مـن بَــيــت مــأصّــل
بَـيّـو جـاد مْـن الــمــوجـــود .......... وْ جـــدّو رجّــــال مْــــعــــدّل
وْ هوّي من بعــد الـمـجـهـود .......... طِــلْــع مْــدلّــل و مْــبــهـــدل
لا مِــن بَـــيّـــو آخـــد جـــود .......... وْ لا رْجــولــيِّـــه مـن جـــدّو[/]


إل بيسـمّـي حـالـو رقّـيـص ــــــــــ ومغنّي , بوصــفــو محـتــار
وياجمــهــور الـيـلـة قـيــس ــــــــــ مين المجـــنون بـهـــالكــــار
إل عم ينظم شعرو ويميــس ــــــــــ بشعرو ورود على الحضّار
ولّا ال عا رقصو حريــص ــــــــــ وعــا عزفو مـن دون وتـــار
أحــمـــد بلّـش بالتخـبـيـص ــــــــــ (مدلل ومبهدل ) كيف صـار؟(بتخفيف الياء)
صار بدو طبخ و تحميص ــــــــــ وتحتو لــزوم نشـعّــل نـــار
بعدو نَي وسـعرو رخـيـص ــــــــــ مهمـــا غلـيـت الأســـعــــار
ما بنرضى نشـغلو حوّيـص ــــــــــ عنـــا ومـا عـنـــدوا أفـكــار
ولِ معـارض بلّـش تفنيـص ــــــــــ وبجنونو مــن أحـمـد غــار
ما عندو فكــر وتـمـحـيـص ـــــــــــ ولا بـالشــعــر مـعـمّـردار
تـنـيتنـاتن مــالـن بصـيـص ــــــــــ صغير يكونوا من الشعّـــار
لــزوم نطالعـلـن ترخـيـص ـــــــــــ وعالـحـضـــانة ينـردّوا
حضانة الشعر

[admin]

مشاركات مميزة من الجوقتين
وان كنت اتمنى على الأستاذ احمد
اختيار موضوع ما لتتجه العركة باتجاه اكثر متعة
فتزدان الأفكار وتزهو الصور
بدلاً من استعراض العضلات وتفتيل الشوارب

[أحمد عيسى]

لمّا بْشـعري بْصير بْصـيـح .......... بْـخـلّـي الأنـجــم تسـمـعـنـا
بضوّي بالـلَّـيـل مْـصـابـيـح .......... وْ فَوق الشمـس بيرفـعـنـا
يـا فَـوزي مْن قـبـالي زيـح .......... لـمّـا الـحـرب بْـتـجـمـعـنـا
عـنّـا قْـوافـي مـتـل الـرّيــح .......... وْ عن قلعَـك شو بْيمنعـنـا
ألـفـاظـك بـدهــا تـصـحـيـح .......... و أشـعارك ما بْـتـنـفـعـنـا
شعري زهـر وْ شـعرك شيح .......... كْسـرتْ المبنـى و المعنـى
مْـعـلّـمـنـا أطـلـق تـصـريـح .......... بْـكـلـمـاتـك عم تـصرعـنـا
بدّو يسمع شـعـر صْـحـيـح .......... حـتـى يْـصـيـر يْشــجـعـنـا
لكن شـعرك شـعر شْـحـيح .......... بْـأشـــعــارك ما تْـمــتّـعـنـا
وْ مني صـار لازم توضيـح .......... حـتـى بْشـعـرك تـقـنـعـنـا
عـم بـيـقــلَّــك بـالـتـلـمـيـح .......... مْعـلّـمـنا لْ شـارك مـعـنـا
يـا بْتنظملو شـعـر مــنــيـح .......... يــمّــا تــمَّــك بِــتــســـدّو

[أحمد عيسى]

تقبّلوأ تحياتي و شكري في نهاية هذه الجولة:




بْشـعـرَك عـلَّـيـت الـرّايـات .......... يا مْـعـارض بيّضتْ الـوِش

و بـو مـنـيـر بْـهــالــردّات .......... صارعْلَينـا بْـعـطـرو يْرش

وِ لْـفَـوزي بـعـد الـجَـولات .......... رح قلّو وْ ما بْعمري بْغش

بْيستاهل عا هـالـحـكـيـات .......... أحـلـى بَـوسِــه عـا خــدّو

[نبيل فيصل]

-------------

هدّوا يا رْفاقي هــدّوا ...... الغيرة عالمنـبر ردّو

من الشعر الصافي ردوا .... الحاسد هالمنبر هدّو

---------------------

بْحسـد (احمد) يا حلوين ..... مني شو طالع اشطر

خجلني و بلكي تخمـيـن ..... عامـلّــي فـخّ مـْـدبّــر


ومن فوزي عم غار ومين .... متلـو عالمنبر عنتر

و شمعة عالمنبر نسرين ...... فايح عطـرو كالعنبر


و لمعارض ما عندو دين ..... وعن خطّـو ما بْـيتغيّر

مهما يشد و مهما يليـن ....... عـا قلبي متـل السكر


انتو جـوقة بـْ جبعادين ...... صرتو فرسـان المنبر

كل شاعر منكن عشرين ... شاعر ما بْـ يلوي زندو

-----------------------------------

[opposition]

الأحبة
أبو منير
فوزي
احمد عيسى
نبيل فيصل
وكل من يتابع هذا الموضوع
قمت بجمع بعض الأفكار الإيجابية من الحوار الذي دار في هذا الموضوع
والتي يمكن اعتبارها أسس عامة تنطبق على كل حوارية زجلية

تجدونها بعنوان (من خبرات وتجارب زجالة سرياني)
على الرابط

http://www.syriane.com/forum/showthread.php?p=23006#post23006


وأرجو أن يدلي كل منا بدلوه في هذا الموضوع
ليكون حواراً مفيداً
يتعلم فيه الجميع
تطبيقاً لتوقيع المدير:

لا أحد أكبر من أن يستفيد >>>>>>>
>>>>>>> ولا أحد أصغر من أن يفيد

[admin]

==تم نقل المشاركات غير الزجلية إلى موضوعين :
1- حوار حول: تحديد الوقت في العركات والحواريات الزجلية
http://www.syriany.com/forum/showthread.php?p=23185&posted=1#post23185
2- حوار حول: كسر الوزن ومخالفة القافية في الزجل
http://www.syriany.com/forum/showthread.php?t=3579

يمكن لأي من الأعضاء متابعة الحوار في هذين الموضوعين حول ما ورد في عنوانهما حصراً

كما يمكن للمعارض أو مشرف المغارة أن يضيف ما يتم الاتفاق عليه وما هو غير قابل للنقاش الى الموضوع التالي:
من خبرات وتجارب زجالة سرياني
http://www.syriany.com/forum/showthread.php?t=3557

أما في هذا الموضوع (عركة قرادي 2)
فيمكن فقط للشعراء المشاركين في العركة والذين لم يكتبو ردة ختامية
أن يكتبوا ردة زجلية ختامية لإنهاء الموضوع

======================================

[admin]

الأخ الحبيب أبو منير مدير المنتدى :
الأستاذ أحمد مشرف مغارة الزجل
الأحبة شعراء المنتدى وأعضاءه الكرام
لنعتمد الأسس التالية حتى نتخلص من أي مشكلة مستقبلية في هذه المغارة التي نحبها جميعاً ونتفاعل معها بشكل مميز:
1- من غير المسموح للشاعر أو لأي عضو أن ينتقد شاعراً آخر من خلال رد في نفس الموضوع الدائر بل يتم ذلك من خلال رسالة خاصة المنتقد والمعني بالأمر ويمكن أن يرسل نسخة منها الى المشرف إذا لزم الأمر ، كما يمكن أن تتم مناقشة المشكلة من خلال موضوع مستقل خاص بهذه المشكلة.

2- من غير المسموح قيام اي عضو بالانتقاد ضمن الموضوع ويسمح للأعضاء غير المشاركين نشر مشاركات تتضمن التشجيع والتحميس فقط.

3- في الحواريات والعركات المفتوحة من ناحية اسماء وعدد المشاركين يمكن لكل الأعضاء المشاركة من خلال ردود زجلية كل حسب خبرته وإمكانياته.

وفقكم الله

[admin]

بانتظار ردة زجلية ختامية من الأخ أبو منير وردة اخرى من الأخ المعارض
ثم نبدأ بموضوع طرحه الأخ نبيل حول الغيرة و الحسد
أو أي موضوع آخر تتفقون عليه

[admin]

الموضوع الذي طرحه الأخ نبيل هو:
الشرق والغرب

وليس :
الغيرة والحسد
و الذي كان قد طرحه الأستاذ جمال

اذاً الموضوع المطروح في حال التوافق عليه هو الشرق والغرب

[حمود للاتصالات]

ياأحمد ولعت وقيد كيف بتنزل علميدان
بتعرف إني كنت بصيد بساحةأكبرفرسان
شعارالعركة بنزيد تركني مع فوزي سيلان
ولفات عللعركةجديد خليني راسو قدو

[علي(عماد)رفاعية]

بين المزح وبين الجد...........قررت برأيي ابدي

ياأحمد انت تحديت.............وأنا قبلت التحدي

سيفك اذا اليوم انسن.........مابيجرحني من خدي

لكن اذا سيفي انسن..........مارح تحسن تهدي

رح علمك أصول الشعر......حتى المرحلة تعَدي

بيكفي .كتروا الجروح.......حاجة ياسيوفي تعدي

لما شافوني الزجالة.........حطوا بالميزان قِدي(القد بمعنى الوزن)

اكتشفو بعد جهد كبير.........بأنو مانك قَدي



مع كل الحب للشاعر أحمد

أرجومن كل من يتابعنا بتنبيهي اذا كان هناك كسر في الوزن أو القافية